كل يوم بروح اطل على ميدان التحرير واقف في وسط الناس واتوه في الزحمه واحاول الاقي حاجه مفيده اعملها، لاحظت ان فيه ناس كتير بتقولي ياحج ويا والدي او يابابا. اول مره شاب من اللي واقفين علي المدخل طلب بطاقتي كنت عايز اقوله مين انت ياجربوع علشان تطلب بطاقتي ده انا بعارض مبارك من ايام ما انت كنت في اللفه ولما سألني في الأخر طب انت مع مين شخطت فيه وقلتله مع المتظاهرين طبعا. تاني يوم ونا داخل طلعت البطاقه بتقبل تلقائي ولما اتسألت تاني انت مع مين رديت وقلت معاكم ياإبني ودخلت وتوهت في الزحمه تاني وانا بقول لنفسي المهم انك عشت وشوفت اليوم بيتحقق وافتكرت مقطع من قصيده كتبها صلاح جاهين عن موت عبدالناصر. طبعا ما افتكرتهاش حبا في عبدالناصر اللي انقلابه وصل حسني مبارك للسلطه في يوم ما ولكن افتكرت الكلام بعيدا عن السياق الأصلي للقصيده
وقـــف الــشريـط فى وضع ثابت
خـلـى الـمـكـنجـى يـرجع المشهد
عــايز أشـوف نفسى زمان وانا شب
داخــل فـى رهـط الـثـورة متنمرد
ومــش عـاجبــنى لا مـلك ولا أب
عـايز أشـوف مـن تـانى واتـذكـر
لـيـه ضـربة من ضربـاتى صابت؟
وضـربـة مـن ضـربـاتـى خـابت
وضربة وقفت بالشريط فى وضع ثابت؟
قــال المـكـنـجـى: رجـوع مفيش
عـيـش طـول مـافـيك أنفـاس تعيش
وبــــــص شـــــــوف ..
ركــن الشـباب صفـوف صـفـوف
ركـن الشـباب فـى السيـنما بيـصفر
مــفــــيـــش وقـــــوف
ركـن الشبـاب فـيه ألـف مليون شب
ومـش عــاجبـهم لا مـلك ولا أب ..
انــــظــــر إلـيـــهـــم
وأنــــــت تــتــذكـــــر
